Tres la nuesa salida d'Auray, tomamos en direición a la península de Quiberon, la inmensa estación balnearia, enllena de vida nocherniega, folixes privaes y deportes náuticos. Tratábase, sobremanera, de visitar la renomada «mariña xabaz» ente Beg an Aud y Beg er Lan, antes d'averanos a Carnac y Locmariaquer, dos de los destinos irrenunciables del día. Quiberon tendría d'habenos amosao la so cara más impresionante, siempres con marees fuertes, gran aguaxe, ruxíu ensordecedor. Pero nun foi asina. Colos Cliffs of Moher d'Irlanda na alcordanza y colo seliquina que taba la mar, vimos xustamente tolo contrario: una península n'auténticu sosiegu.
Semeyes de la «mariña xabaz» de Quiberon: una gavilota sollerte toma’l sol xexilando la mar y una panorámica del llugar. Aire, bien poco, casi tuvimos que soplar pa que la bandera d’Asturies se ximielgara.
Fiximos delles semeyes de los pedreos de granitu, la primer foto del viaxe cola bandera d'Asturies y escribimos delles postales nun bar de la que tomábemos una cerveza. Al colar, dirixímonos a una enorme casona que se llevantaba nel horizonte como un fitu a lo cabero de la península, pero yera privao y nun pudimos parar: el castiellu de Turpault, construyíu en 1904, xusto al mesmu tiempu que'l llavaderu de Porrúa. A la salida de Quiberon, a la izquierda, xunto a l'istmu, la fortaleza de Penthièvre (1747), d'usu militar, onde asocedieron dellos fechos históricos, como la matanza de más de 700 nobles monárquicos mientres la Revolución.
No hay comentarios:
Publicar un comentario