Etapa 1: Auray

Almorzamos nel hotel: café, gateau bretón, tayaes de pan turrao, pan, ceberes, zusmiu, compota, mermelada y mantequilla. A les 8:15 dexamos Vannes dirección Larmor-Badden onde mercamos unes postales. Nesti pueblu queríamos coyer un barcu hasta la Islla de Gavrinis pa ver un túmulu espectacular, pero nun pudimos afaenos a los horarios del barcu. Foi una pena, porque ensin dulda esta ye una de les visites más interesantes de toa Bretaña: los grabaos que reproducimos equí dan bona fe d'ello. Amesto tamién unes semeyes d'una visita fecha dempués, l'añu 2008. Nota sobro la fonética de Gravinis: debe tenese en cuenta que nel bretón faláu nesta fastera llitoral pronúnciase tamién la "s" final, al contrariu qu'en francés.

Túmulu de Gavrinis: xera mayestra del arte megalíticu

Del conceyu de Larmor-Baden depende'l castru (islla pequeño) de Gavrinis, conocíu universalmente por poseyer ún de los meyores megalitos qu’esisten anguañu. El nome d’esta migayina tierra de menos de 15 hectáries vendría, de según una interpretación percomún, de «Islla de la Cabra» (de Gawr, cabra y inis, islla), o tamién de la «Facienda del Xigante», en bretón Kawr, en referencia a un xigantescu dios celta que vieno a conocese tamién como Gargant o Gargantúa, del que falaremos más alantre (ver Mont-St-Michel). L’alcordanza d’elli caltúvose en Bretaña baxo’l nomatu xenéricu de Kawr/Gawr. D’ehí vien el topónimu del Cabu la Cabra (en realidá del Xigante: Beg ar C’hawr), d’ehí tamién el pueblu y la península de Gâvres (Port-Louis) y la viesca de Gâvres (al par de Nantes).

El túmulu, d’unos 100 m de circunferencia nel pie y d’un altor d’unos 8 metros, recubre unes cuarenta llábanes que formen un espectacular dolmen de galería. L’altor d’esti pasiellu ye de 1,60 m, a lo llargo de 14 metros, con un anchor del espaciu de 1,50 m. La cámara, cuasi cuadrada (2,60x2,50 m) tien una bóveda a 1,80 d’altor y ta rodiada de 9 llábanes, pero la descomanada llastra de granito que la cubre, esbórdala guapamente colos sos 4x3 metros.

23 llábanes amuesen los grabaos más notables d’esti tipu de monumentos, con composiciones decoratives mui riques a base d’espirales, círculos y semicírculos. Pero hai dellos debuxos menos comunes como hachos de piedra, fueyes de felechu o cuélebres enfrentaos, interpretación non poco atrevida de les llínies, enarcáes o simétriques, que se pueden atopar ellí. En tóu casu yá Yannik Rolando y René-Serge Minot nel so estudiu de los megalitos de Morbihan afirmen que «nun pueden entendese los grabaos de Gavrinis sin ponelos en rellación colos d’España y Portugal, por ser dos civilizaciones emparentáes».

--------------------------------------------------------------------------------------------------------------------------------------

Colamos a Baden y Le Bono, aú ta'l túmulu de Kernours, con entrada de dolmen y unes midíes de 15 metros de llargu y 1,5 metros d'altu nel interior. Sobro la «puerta», unes veles. Lo primero que pensé foi nos muertos (qu'anda que nun van tar yá pasadinos...), pero claru, taben ende pa poder ver l'interior del túmulu. Nun teníamos chisqueru asina que nun pudimos ver muncho dientro. Según la Guía Verde Michelín, había otros túmulos, pero nun los vimos.

El túmulu de Kernours

A la salida de Kernours, na carreterina que va de Le Bono a Mané-Verh y de frente a la última casa’l pueblu, una viesca de pinos escuende el dolmen acodáu del mesmu nome. Dicen los llibros y les guíes qu’equí hai ocho tumbes prehistóriques arringláes. En metada la viesca allevántase perñidiu’l túmulu principal, cubiertu de tapín verde, qu’abelluga’l dolmen neolíticu de galería citáu. 35 llábanes enconten esti monumentu funerariu acodáu a la drecha. La parte d’aniciu del pasiellu, d’una docena de metros de llargor, ta orientada al oeste, la segunda oriéntase al sur y mide unos 7,50 metros. L’espaciu enánchase na punta faciendo l’acostumada cámara fúnebre.

Los otros siete monumentos (sepultures circulares) paez que son más recientes, de la Edá del Fierro: seis tan al norte del Cairn principal y el séptimu al sur, pero nun pudimos velos pela redolada.

------------------------------------------------------------------------

Auray foi'l nuesu viniente destín. Aparcamos el coche en zona azul. Nun había parquímetru, pero reparamos que tolos coches teníen un discu como los qu'usaben en Xixón fai unos venti años. Al preguntar nuna tienda por él, dixéronnos que, en llugar de mercalo, pa una estancia d'un par d'hores, un simple papel coles hores de llegada y de partida, sirviría. Merci, Madame.

Arriba, la puerta la Casa Conceyu, llena flores; depués la pindia Rue du Château condúznos del centru de la ciudá d'Auray a la ponte de St. Goustan. Na siguiente semeya, un detalle de fierro nuna ventana de la mesma cai. Abaxu, un detalle de la ponte de St. Goustan (sieglu xv), qu’amesta la ciudá d’Auray al barriu del mesmu nome.

Como ciudá bretona «d'arte ya historia» Auray ye una de les villes que más nos gustó. El fechu hestóricu más interesante asocedíu en Auray ye la batalla del sieglu XIV na que se punxo fin a la guerra de Sucesión de Bretaña. Pasiamos escontra la ilesia y l'oficina de turismu ensin imaxinar lo que díbamos ver dempués, porque en pasiando por delles cais llenes de flores per tolos llaos (inclusive l'Ayuntamientu, ¿imaxináis eso en Xixón?), entamamos la baxada al puertu pela cuesta de la cai del Castiellu. Y de sópitu, la sorpresa: la zona del puertu ye guapísima, a un llau un paséu con arbolea y al otru llau del ríu, la parte antigua de la ciudá: St. Goustan. La goleta de San Salvador caltién l'alcordanza de cómo yeren d'antiguo los barcos del país. La cai Quai Franklin, que va bordiando’l ríu Le Loch a la derecha la ponte de St. Goustan, caltién nel númberu 8 la casa onde s'abellugó Benxamín Franklin n'avientu de 1776, cuando la guerra d’Independencia. Franklin foi encargáu de negociar un primer tratáu con Lluis XVI pa echar a los ingleses de norteamérica. Pero vientos contrarios torgaron al so navíu Reprisal llegar a Nantes, el so verdaderu destín.

Curiosa semeya d’un monxu con un pexe encolingáu na parede d’una casa en St. Goustan. ¿Significáu? Nun soi a decatame, nin fui quien a atopar información.

Na parte alta de la zona antigua hai dos ilesies, una d'elles taba en restauración en 2004. Amás, recuérdase nuna placa xuntu a la ponte que, aprosimao en 1625, el cardenal Richelieu unvió a Canadá al barcu Esperanza pa reconquistar la rexón d'Acadie, anguaño territoriu canadiense pero con tradiciones y fala bretona. Precisamente'l Festival Intercélticu de Lorient de 2004 tuvo dedicáu a ellos y los sos grupos amosaron una bayura musical y una simpatía perbones. A lo último pasiamos per tol barriu de St. Goustan con enorme placer de los sentíos. Dempués volvimos xubir les cuestes de vuelta a Auray y aprovechamos pa facer una semeya panorámica estraordinaria.

Espectacular vista de St. Goustan (en 2004), que fora nel so momentu'l tercer puertu bretón, y detalle (en 2007) de la placina de San Salvador, xunto la ponte del sieglu xv. Equí y nes cais traseres hai cases perguapes del mesmu sieglu, con entramáu de madera y, a vegaes, con grandes pasos de piedra escalonaos.

Auray. La batalla de 1364

Al par del guapísimu golfu de Morbihan, la vieya villa d’ Auray ye una de les ocho ciudaes bretones que tienen el títulu de «Villa d’arte ya historia». Un encantu especial arrodia l’espaciu del ponte qu’amesta la villa al vieyu barriu de St. Goustan.

Paez ser que’l nome d'Auray vien de Bro Erec’h (el país d’Erec), al que pertenez la ciudá. Quiciabes un destín fatal quiso qu’Auray apaeciese nos llibros por circunstancies bien murnies, de les que quiero sulliñar la batalla del 29 setiembre de 1364 que punxera fin a la guerra de Sucesión de Bretaña: Jean de Montfort (dempués duque Jean IV) venció al so primu y alversariu Charles de Blois, que –allugáu nuna permala posición, nuna campera llamargosa– morrió na engarradiella.

Montfort tenía’l contéu de les fuerces ingleses de Robert Knolles y un asitiamientu favoratible. Blois solamente cuntaba col sofitu de numberosos señores franceses. Como n’Escocia cuando la batalla decisiva de Culloden (clanes escoceses nes dos partes de la griesca), equí tamién los bretones combatíen en dambos bandos. Con dos mil homes d’armes y mil arqueros Jean de Montfort aventayó un exércitu de cásique cuatro mil xinetes. Du Guesclin, del que falaremos más alantre (ver Dinan), fiel al rei de Francia, taba ente los vencíos. Nun-y valiera de nada’l sabiu conseyu que diera, contrariu al ataque.

Pa poner fin a la guerra, dambes partes xuraran nun facer prisioneru al pretendiente alversu, sinón matalu aportara lo qu’aportare. Charles de Blois, feríu de muerte por un puñal inglés, allevantara les manes glayando «!Ah…¡ Domine deus» y morrió de secute, entainando la derrota de los franceses. Fondamente piadosu, cuando-y arramplaren les vestimentes atopáren-y un ciliciu al rodiu’l cuerpu. Conclusión: cuanto más relixosu, más fatu. Sólo un allocáu puede tener ocurrencia tan babaya. Debe ser por eso mesmo que la Ilesia fízolu santu hai dellos años. Y yá d’aquella’l primu Jean fízo-y nel sitiu onde morrió una colexata dedicada a San Miguel (día de la batalla).

Como nun dexa ún de ser un caballeru nin nes circunstancies más abegoses, el xefe inglés desixó la rindición de Du Guesclin con estes pallabres: «Esti día nun foi’l vuestru, mio señor Bertrand. Quiciabes n’otra ocasión taréis más gayoleru».

-------------------------------------------------------------