Etapa 1: Carnac

Carnac amosónos los sos 4.000 menhires en malapenes 4 km. Foi un paséu nel espaciu, pero sobremanera nel tiempu. Lo primero foi visitar el Centru de Recepción de Le Ménec, construyíu va poco con planta semicircular. Amás de l'acostumada y bien estensa bibliografía sobro temes de Bretaña, sentímonos interesaos por una esposición de paneles desplicando'l procesu de rehabilitación de los megalitos de Carnac, empicipiáu col zarru de les camperes al públicu en 1991. Hai en marcha ambicioses midíes de caltenimientu y restauración, y detállense con rigor los pasos que les autoridaes decidieren dar pa llograr qu'esti enorme espaciu vea superada la degradación a que foi sometíu pol fluxu constante de millones de visitantes, y recupere el so estáu «natural». Analiza estremaes fórmules: 1. l'axardinamientu del llugar, lo que dexaría que'l públicu circulara per dos sendes preafitaes (ye lo que llamamos «la solución Areces»); 2. la restauración del mantu vexetal con especies esbillaes, pero ayenes a esti mediu o, 3. la meyor y la escoyida: dexar que la naturaleza trabaye por sigo mesma de mou que sían les mesmes especies del llugar, dende los llíquenes más ruinos, les que recuperen el so espaciu, ensin qu'importe'l tiempu qu'esti procesu traiga. Un determín políticamente aventurau, pero científicamente impecable tanto dende'l puntu vista ecolóxicu como dende'l del caltenimientu del patrimoniu.

D'esta manera, y pa qu'enxamás llegue a reproducise la degradación del xacimientu, van establecese árees d'estremada proteición, de cuenta que les visites autorizaes circulen namás n'espacios consolidaos y baxu un control estrictu del númberu de visitantes, etc.

Dempués de tan ilustrativa información averamos al xacimientu, zarráu dende va dellos años, sacantes un pequeñu espaciu abiertu al públicu. Maravía ver obra de tal valumbu, que la so función ye tan difícil d'imaxinar como les xeneraciones qu'hubieren trabayar na so construcción. Caméntase que foron necesaries ente mediu millón y un millón de xornaes de trabayu pa consiguilo. Intercambiamos opiniones sobro'l significáu d'esti enorme campu de menhires y tuvimos d'alcuerdu en refugar les teoríes relixoses y les astronómiques: nin llugares de cultu a los elementos primordiales nin observatorios celestes. Dimos una vuelta completa al llugar, impresionaos pola grandura y el misteriu que destila esti enclave, y siguimos viaxe a Locmariaquer, onde nos esperaba'l Centru de los Monumentos Nacionales de Francia, un xacimientu de pagu con trés importantes restos arqueolóxicos del máximu interés: el Gran Menhir (Men-er-Hroeg), el menhir más grande del mundu, el dólmen de la Table des Marchands y el túmulu d’Er Grah, tou ello investigao y restaurao ente 1986 y 1992. Esti conxuntu monumental, bien allegáu a Carnac, de visita obligada, ilustra por sigo solo la diversidá del patrimoniu megalíticu bretón y européu.

Carnac: un misteriu del pasáu

L’alliniamientu megalíticu fae de Carnac el símbolu de la prehistoria, del mesmu mou que lo ye Stonehenge nel Reinu Xuníu. Dende los caberos años del sieglu XVIII, cuando se vulgarizaren los nomatos «dólmen» y «menhir», pocos llugares ficieron ñacer tantes teoríes y alderiques…

El nome de Carnac tien una etimoloxía perñidia: vien del celta karn, col significáu de «piedra» o «roca».

Al norte del pueblu amuésase tolo esencial del megalitismu bretón: alliniamientos, dólmenes y túmulos a esgaya. Piedres alzáes nel neolíticu con dalgún fin sobre’l que nun somos a tar d’alcuerdu. Sábese que los dólmenes yeren sepultures de notables (mas que tampocu ye de xuro que foren destinaes únicamente a facer de sepulcru), pero dizse tamién que lo que vemos güei nun ye sinón la cadarma que se caltién dempués de sieglos d’erosión. L’oxetivu esautu de los alliniamientos de menhires de Le Ménec, Kerlescan o Kermario siguirá munchos años ensin entendese. Hailos que camienten que dellos foren un fitu, una marca pa decatase d’un determináu puntu nel espaciu, pero nun ye posible que toos tuvieren esta función.Y, pa finar estos camientos, páezme que creyer que los alliniamientos y los cromlec’hs teníen un calter relixosu nun se caltién sobre la menor certidume.

Si s’atalanta nel abegosu númberu d’estrozos que frayaron los megalitos y si se pescancia que, a pesar d’estos desanicios, les camperes de Kerlescan, de Kermario, de Le Ménec y de Kerzehro caltienen ellos solos 4.921 menhires repartíos en sólo cuatro ensames muy averaos ente sí, ún nun puede menos de quedar plasmáu. Estos costeros, dacuando en vez con un altor más de dos veces la d’un home, hebo que sacalos del suelu, tresportalos, asitialos y endrechalos. Esti trabayu descomanáu hebo de desixir l’andecha de tou un pueblu. La importancia de los trabayos executaos (podría comparase a la construcción de les catedrales medievales) tuvo qu’averar a Carnac auténticos verbeneros de xentes veníes de muy lloñe.

Una tradición popular de Bretaña fae de los menhires seres humanos petrificaos. Por nun citar más que dellos exemplos, tal ye’l casu de los menhires ximielgos de Runélo (na Belle-Ile) o de los dólmenes de Kerroch en Plounéour-Trez. En Carnac, la tradición considera les piedres alliniaes como soldaos llantáos nuna inmovilidá eterna y ye común sentir cómo’l pueblu tien pa ellos el nomatu de «soudarded sant Corneli» (soldaos de San Corneliu, patrón de Carnac y de los animales con cuernos: ver la so estatua na portada principal de la ilesia) y cúlpase a esti papa de la tresformación.

Ente cuatro y cinco mil menhires, alliniaos o deseparaos, allevantaos o tumbaos, mui numberosos dólmenes, cuetos tumulares, corros y cuadriláteros de piedres arreches, oxetos d’oru, de cobre o de sílex clasificaos nos museos de Carnac, de Vannes, de Saint-Germain-en-Laye o nel mesmu British Museum: esos son los ñicios dexaos ente los ríos Etel y Auray por una civilización clisante y misteriosa. Un sieglu d’escavaciones nun foi a esclariar l’enigma propuestu por centenes de miles de tonelaes de granitu allevantaes por xentes a traviés del campu vénetu. Sólo atopamos una conclusión, d’alcuerdu col especialista de la prehistoria armoricana P.R. Giot, y ye que «tolos datos nun son a esclarianos gran cosa sobre la razón de ser d’estes piedres: separtaes o agrupaes, caltiénense aguruyaes nun espesu misteriu».